МАНАН

Урьд шөнө HepG2 эсийн өсгөврүүдээ хөлдөөх шингэнд хийж, өөртөө нөөц үүсгэж авлаа. Анх удаа хийсэн болохоор нарийн нарийн чимхлүүр ажил дээр маш их цаг алдаж, ажил саатав. 18 "таваг" эсийг -80 хэмийн гүн хөлдөөгчинд хийсэнийхээ дараа үлдсэн 2 "таваг" эсээ 1/10 харьцаагаар шингэлээд ажил дуусав...

Цагаа хартал өглөөний 5 цаг, гадаа гартал битүү манан. Эргэн тойрон 10-12 метрээс цааш юу ч харагдахгүй... Салхины аясаар мод найгах нь хэдхэн метрийн цаадах юмаа олж харахгүй байгаа надад багадаа үзэж байсан хэдэн аймшгийн киноог эрхгүй санагдуулдаг байна ш дээ. (айгаагүй ч гэлээ эвгүй байлаа гэж...)

Хамгийн сүүлд хэзээ ийм өтгөн манан дунд байснаа санах гэж оролдов. Өмнө нь ийм өтгөн битгий хэл жинхэнэ, хэсэгхэн манан ч үзээгүй юм байна. Харин ухаан бодол маань бодлын гүн, өтгөн манан дунд хэдэнтээ хөрвөөж байснаа саналаа...

Одоо бол нойр хүрч байна гэж жигтэйхэн, үүрээр 5-д унтаад 7.30-д боссон болохоор нүд өөрийн эрхгүй анилдаж байна. Харьж унтая даа... (ингэхэд цаг хэд болж байгаа юм бол?)