Урьд шөнө би нэгэн сонин зүүд зүүдэллээ. Арван жилийн 2 найзтайгаа уулзаж байна гэж зүүдлэв. 1996 оны хавар 8-р ангиа төгссөнөөс хойш тоотойхон уулзсан 2 андаа ингэж зүүдэлнэ чинээ огт санасангүй. Яг бодитой юм шиг, тэрхүү үйл явдалд оролцоод байгаа мэт "өнгөтөөр" зүүдэлсэн юм. Гэтэл одоо чухам юуны талаар зүүдэлсэнээ санах гээд чаддаггүй ээ. Миний дурсамжийн, миний бодол санааны нэгээхэн хэсгийг баллурдаад арилгачихсан мэт юуг ч санадаггүй ээ. Уг нь зүүдэндээ уулзасан 2 найзын нэг нь энд наран улсад байгаа болохоор юуны талаар, юу гэж зүүдэлсэнээ ярия даа гэж бодож байсан юмсан...
Ингээд бодол болоод сууж байсан чинь байна шүү, нэгэн бодол зурс гээд өнгөрдөг юм байна. БИ өдийг хүртлэх 27 жилийн амьдралдаа сайн, муу, сайхан, муухай янзан бүрийн үйл хийсэн шүү. Гэтэл одоо саная гэхнээ муу, муухай үйлийнхээ тоотой хэдхэнийг санаад, сайн, сайхан үйлээ тоолшгүй олноор нь дурсах юм. Үнэхээр муу, муухай үйлээ санахгүй байна уу, эсвэл санахыг хүсэхгүй байна уу? БИ өнгөрсөн цаг хугацаанд гаргасан алдаа бүрээсээ ухаарал авч, хожмын үйлдээ дахин давтахгүй байхыг хичээсээр ирсэн болохоор сайн, сайхан нь тоолшгүй олон болсон юмуу даа. Ингэж амьдрах ухааныг зааж сургасан аав, ээждээ талархаж явая, Ингэж амьдрах ухааныг үр хүүхэддээ заах аргад нь амжиж суралцая даа...
Subscribe to:
Post Comments (Atom)
No comments:
Post a Comment